Pas tre ditësh reshjesh intensive dhe stuhish të forta, Shkodra duket se po i rikthehet normalitetit. Në një lidhje Skype për emisionin “Mirëmëngjes Shqipëri”, Bekim Mema, Drejtor i Përgjithshëm i Zhvillimit të Qëndrueshëm Ekonomik në Bashkinë Shkodër, bëri një panoramim të situatës dhe masave të marra nga institucionet vendore.

“Situata është e normalizuar. Aktualisht nuk ka reshje, por sipas njoftimeve të Institutit të Meteorologjisë pritet që gjatë ditës të ketë sërish reshje. Fatmirësisht, falë ndërhyrjeve të kryera vitet e fundit, reshjet e kësaj periudhe ishin të përballueshme”, u shpreh Mema.

Ai theksoi se parandalimi ka qenë çelësi për menaxhimin e situatës, duke shtuar se të gjitha strukturat ndodhen në gatishmëri dhe në koordinim të plotë.

Mema bëri të ditur se zona më e goditur ka qenë Thethi, ku rrëshqitjet e dheut dhe gurëve shkaktuan bllokim të qarkullimit për disa orë. Njësitë e ndërhyrjes përdorën mjete të posaçme për hapjen e rrugës.

“Zonat e tjera të Bashkisë Shkodër janë të qeta. Ka patur vetëm ndërhyrje sporadike, por asnjë problematikë serioze që të cënonte jetën e qytetarëve,” tha Mema.

Ndër zonat që tradicionalisht përballet me përmbytje, Nënshkodra këtë herë ka rezultuar më e mbrojtur falë punës së kryer në pastrimin e kanaleve të para, të dyta dhe të treta nga bordi i kullimit.

“Pastrimi i kanaleve ka dhënë rezultate konkrete. Nuk kemi pasur problematika serioze,” theksoi ai.

/rtsh.al/