Ukraina u godit sërish nga sulme ajrore gjatë natës, ku raketat dhe dronët rusë shkaktuan viktima dhe dëme të konsiderueshme.

Sipas autoriteteve ukrainase, të paktën katër persona humbën jetën dhe mbi 20 të tjerë u plagosën, ndërsa presidenti Volodymyr Zelenskyy përsëriti thirrjen për sisteme të avancuara mbrojtëse nga vendet perëndimore.

Në kryeqytetin Kiev, dy qytetarë u vranë dhe 13 të tjerë u plagosën si pasojë e një sulmi me raketa balistike.

Sipas shërbimeve të emergjencës, një zjarr shpërtheu në një objekt jo-rezidencial, ndërsa mbeturinat e raketave të interceptuara ranë në një zonë të hapur, duke dëmtuar ndërtesa përreth.

“Qyteti është nën sulm balistik,” njoftoi kryebashkiaku Vitali Klitschko në rrjetin Telegram.

Në rajonin e Dnipropetrovskit, dy persona të tjerë humbën jetën dhe shtatë u plagosën. Guvernatori rajonal, Vladyslav Haivanenko, raportoi dëme në ndërtesa banimi dhe shtëpi private.

Forcat ajrore ukrainase deklaruan se Rusia lëshoi nëntë raketa dhe 62 dronë, nga të cilët 50 dronë dhe katër raketa u rrëzuan nga mbrojtja ajrore ukrainase.

Presidenti ukrainas Volodymyr Zelenskyy reagoi pas sulmeve, duke theksuar se nevoja për sisteme mbrojtëse Patriot është më urgjente se kurrë.

“Pikërisht për shkak të sulmeve të tilla, i kushtojmë vëmendje të veçantë sistemeve Patriot – për të mbrojtur qytetet tona nga ky tmerr,” shkroi ai në platformën X.

Zelenskyy u bëri thirrje vendeve partnere, përfshirë SHBA-në, Evropën dhe grupin G7, që të veprojnë konkretisht për të ndihmuar Ukrainën në përballimin e kërcënimeve ajrore.

/rtsh.al/