Deputetja e Partisë Demokratike, Jorida Tabaku, e cila mban edhe postin e Kryetares së Komisionit për Mediat dhe të Drejtat e Njeriut, ka zhvilluar këtë të mërkurë një seri takimesh në Berlin. Në qendër të diskutimeve me ligjvënësit gjermanë ishin sfidat e demokracisë në Shqipëri dhe ecuria e procesit të integrimit evropian.

Gjatë vizitës në Bundestag, sipas RTSH 24, Tabaku u prit nga deputeti gjerman Knut Abraham. Në fokus ishte gjendja aktuale e lirisë së medias dhe domosdoshmëria për standarde të larta zgjedhore.

“Transparenca dhe një media e pavarur janë themeli i një sistemi demokratik funksional,” citohet të ketë thënë Tabaku, duke shtuar se vetëm përmes tyre mund të rikthehet besimi i qytetarëve tek institucionet shtetërore.

Agjenda e deputetes demokrate vijoi me takime të tjera të rëndësishme, përfshirë atë me Peter Beyer, kryetar i grupit të miqësisë së Bundestagut me Ballkanin Perëndimor, si dhe me deputetin David Preisendanz. Në këto biseda, spektri i diskutimit u zgjerua duke përfshirë panoramën politike dhe atë ekonomike të vendit.

Tabaku theksoi para partnerëve gjermanë se qeverisja e mirë, mjedisi i shëndetshëm mediatik dhe integriteti i proceseve zgjedhore nuk janë thjesht çështje të brendshme, por faktorë përcaktues për shpejtësinë e anëtarësimit të Shqipërisë në Bashkimin Evropian.

Në përmbyllje të vizitës, Tabaku u shpreh se e ardhmja europiane e Shqipërisë është e pazgjidhshme nga ndërtimi i institucioneve të qëndrueshme dhe zbatimi i reformave që sjellin rezultate konkrete, duke konfirmuar angazhimin për të punuar ngushtë me partnerët strategjikë në Berlin dhe Bruksel.

/rtsh.al/