Galeria e Arteve Shkodër ka çelur edhe këtë verë ekspozitën me vepra nga fondi i saj. Ekspozita do të qëndrojë e hapur deri në muajin shtator.

Në të janë përfshirë rreth 50 vepra të autorëve të njohur të artit pamor shqiptar. Disa prej tyre prezantohen për herë të parë për publikun.

“Kësaj radhe ekspozita, e cila kurohet prej specialistit të Galerisë së Arteve, zotit Sidrit Loja, është ndalur te lirika kreative, duke filluar diku nga vitet ’60 deri te vitet ’80, me një shtrirje emrash në të gjithë Shqipërinë“, tha Fatmir Juka, përgjegjës, Galeria e Arteve Shkodër

Përgjegjësi Juka thekson se ekspozimi i këtyre veprave ndihmon në promovimin e trashëgimisë kulturore dhe artistike të Shkodrës dhe të vendit.

“Ne vazhdojmë t’i mbesim besnikë një tradite, siç është periudha e gushtit, që është periudha me ngarkesën e vizitueshmërisë më të madhe, jo vetëm lokale, por edhe ndërkombëtare. Pra, kemi turistë të huaj që vijnë dhe duhet të njohin, përveç traditave që ka Shkodra, edhe artin që përcjell ky qytet.”, tha ai.

Galeria e Arteve Shkodër ka mbyllur gjysmën e parë të kalendarit artistik me disa ekspozita dhe aktivitete kushtuar artit pamor.

Gazetar: M. Gjini            

/rtsh.al/