Edhe pse prej vitesh larg jetës aktive politike, ish-presidenti, Alfred Moisiu, ndjek me kujdes situatën politike në vend.

Në një intervistë për Radio Televizionin Shqiptar, ish-kreu i shtetit, tregon se veprimi i Ramës, për hapjen e turit me diasporën, në Greqi, ishte ai i duhuri. “Duhet të punojmë për të bërë shtet dhe ky shtet nuk bëhet për një javë apo për një vit, do kohën e vet”, tha Moisiu.

Moisiu bëri thirrje që t’i jepet fund korrupsionit në vend, pasi është pikërisht ky faktor, që po pengon rrugën e Shqipërisë drejt BE. “Fenomenet e korrupsionit janë të rrezikshme pasi gërryejnë shoqërinë. Është një arsye e fortë që rinia të largohet nga vendi dhe me të drejtë”, tha ai.

Ish-presidenti tregoi dhe rrugët që duhet të ndjekë politika shqiptare, në mënyrë që bashkëjetesa mes tyre të jetë e paqtë dhe në interes të qytetarëve.

Alfred Moisiu ka qenë President i Republikës së Shqipërisë nga viti 2002 deri në 2007, pas përfundimit të detyrës është marrë kryesisht me shkrimin e librave dhe aktivitete te ndryshme.

Gazetar: Marjo Merhori

/rtsh.al/