Tottenhami dhe Manchester United do të përballen sot në mbrëmje në orën 21:00 në stadiumin “San Mamés” të Bilbaos, në një sfidë që do të kurorëzojë skuadrën kampione të këtij edicioni të UEFA Europa League. Finalen e madhe të Europa League mund ta ndiqni drejtpërdrejt në RTSH 1 në orën 21:00.

Kjo është hera e dytë në historinë e Europa League ku në finale përballen dy skuadra angleze. Herën e fundit që kishte një derbi anglez në finale në vitin 2019, Chelsea mposhti Arsenalin 4-1.

I pamposhtur në Europa League këtë sezon, Man Utd ka bërë paraqitje plot emocione dhe përmbysje të çmendura në rrugën e tyre drejt finales së Ligës së Evropës, por Ruben Amorim nuk do të ngushëllohet në këtë fakt nëse nuk mund t’i kapërcejë Spurs-at.

“Djajtë e Kuq” e fituan këtë kompeticion nën drejtimin e José Mourinhos në vitin 2017, por më shumë djeg humbja në finalen e 2021 ndaj Villarrealit. Tottenham synon një trofe kontinental që mungon që nga viti 1984.

Formacionet e mundshme:

Tottenham: Vicario; Pedro Porro, Romero, Van de Ven, Udogie; Sarr, Bissouma, Bentancur; Johnson, Solanke, Richarlison

Man Utd: Onana; Yoro, De Ligt, Maguire; Mazraoui, Ugarte, Casemiro, Dorgu; Diallo, Højlund, Fernandes