Një aksident i rëndë pune ka ndodhur pasditen e sotme, rreth orës 16:30, në një kantier ndërtimi në zonën e Kunës në Shëngjin, ku një punëtor humbi jetën tragjikisht.

Viktima është shtetasi A. Z., 36 vjeç, banues në Pllanë të Lezhës. Sipas informacioneve nga Drejtoria Vendore e Policisë Lezhë, 36-vjeçari dyshohet se ka rënë aksidentalisht nga lartësia e vendit ku do të vendosej ashensori në objektin në ndërtim. Si pasojë e rënies, ai humbi jetën në vendngjarje.

Shërbimet e Policisë dhe zjarrfikëses mbërritën menjëherë, duke bërë të mundur nxjerrjen e trupit të viktimës.

Një grup hetimor ndodhet në vendngjarje dhe po punon intensivisht për të zbardhur plotësisht rrethanat e aksidentit. Hetimet do të përqendrohen në përcaktimin e shkaqeve të rënies dhe nëse kompania ndërtuese ka respektuar të gjitha masat e sigurisë teknike në punë, në përputhje me legjislacionin në fuqi.

/rtsh.al/