Është gjetur trupi i pajetë i fëmijës së tretë, djalit 3 vjeç në ujërat e lumit Buna, ndërsa ende vijojnë kërkimet për trupin e nënës, Alma Arrazi. Bëhet me dije se trupi i të miturit u gjet rreth 1 kilometër larg vendit ku një ditë më parë (6 maj) palombarët gjetën trupin e motrës së tij 8 vjeçe. Të dielën u gjet edhe trupi i pajetë i motrës së tyre të madhe 9 vjeçe.

39-vjeçarja Alma Arrazi dyshohet se u vetëmbyt sëbashku me 3 fëmijët në lumin Buna, ndërsa ende vijojnë kërkimet për trupin e saj.  

Ngjarja e rëndë ka shokuar opinionin publik, teksa Policia ka arrestuar bashkëshortin e 39-vjeçares, Erdgy Arrazin. 

Sipas Prokurorisë së Shkodrës, Erdgys Arrazi ka dhunuar psikologjikisht në mënyrë të vazhdueshme bashkëshorten, shfaqur në formën e ofendimeve të vazhdueshme dhe tradhtisë bashkëshortore, duke prekur rëndë dinjitetin e saj dhe duke e çuar atë drejtë vetëvrasjes.

Ai pritet të dalë sot para Gjykatës për t’u njohur me masën e sigurisë, ndërsa në deklarimet në Polici ai ka mohuar të ketë dhunuar bashkëshorten dhe të jetë bërë shkak për vendimin e saj tragjik.

/rtsh.al/