Agjencia kryesore e shëndetit publik në SHBA, Qendrat për Kontrollin dhe Parandalimin e Sëmundjeve (CDC), u përfshi nga trazirat të mërkurën, pasi drejtoresha e sapoemëruar Susan Monarez refuzoi të largohej nga detyra pas shkarkimit të saj të papritur nga administrata Trump.

Departamenti i Shëndetësisë dhe Shërbimeve Njerëzore (HHS) njoftoi largimin e saj përmes një deklarate të shkurtër në rrjete sociale, pa dhënë arsye:

“Susan Monarez nuk është më drejtoreshë e CDC. E falënderojmë për shërbimin e saj ndaj popullit amerikan.”

Por Monarez, e cila u konfirmua nga Senati vetëm një muaj më parë, kundërshtoi vendimin dhe përmes avokatëve të saj deklaroi se po “shënjestrohej” për qëndrimin e saj në mbrojtje të shkencës dhe shëndetit publik. Ata thanë se ajo kishte refuzuar të mbështeste urdhra “jo-shkencorë”, përfshirë propozime për ndryshime drastike në politikat e vaksinimit.

Raportime nga Washington Post dhe New York Times sugjerojnë se përplasjet mes Monarez dhe Sekretarit të Shëndetësisë, Robert F. Kennedy Jr., nisën pikërisht për këto çështje, duke çuar në një krizë brenda agjencisë.

Shkarkimi ka shkaktuar një valë largimesh brenda agjencisë, me të paktën tre udhëheqës të tjerë të CDC-së që kanë dhënë dorëheqjen publikisht pas njoftimit të HHS.

Monarez, 50 vjeç, ishte drejtoresha e 21-të e agjencisë dhe e para që kaloi nëpër konfirmimin e Senatit pas një ligji të vitit 2023. Ajo u emërua drejtoreshë e përkohshme në janar dhe më pas u zgjodh si kandidate në mars, pasi Trump tërhoqi papritur zgjedhjen e tij të parë, David Weldon. Ajo u betua më 31 korrik – më pak se një muaj më parë – duke e bërë atë drejtoreshën më të shkurtër të CDC-së në historinë e agjencisë 79-vjeçare.

/rtsh.al/