Analisti Lorenc Vangjeli, duke komentuar Progres Raportin e Bashkimit Evropian për Shqipërinë në emisionin “Trialog” në RTSH, e cilësoi atë si një “lajm të mirë”, duke theksuar se ai shënon thjesht një stacion tjetër në rrugën e gjatë të integrimit.

Vangjeli e përdori këtë moment për të bërë një reflektim më të gjerë mbi kontributin e individit shqiptar në rrugën drejt Evropës.

“Ka qenë një rrugë me zig- zage. Pranohet një e vërtetë që shqiptarët janë individë të jashtëzakonshëm, me aftësi mbijetese dhe përshtatje,” u shpreh Vangjeli.

Ai theksoi se kur atyre u ofrohet ambienti i duhur, shumica e shqiptarëve përbëjnë histori suksesi, duke vënë në dukje se shqiptarët e nisën nga hiçi dhe tani janë në mesataren e qytetarëve evropianë.

Vangjeli ishte kritik ndaj qeverisjeve të njëpasnjëshme, duke theksuar se progresi mund të kishte qenë shumë më i madh.

“Nëse qeverisjet e njëpasnjëshme do të bënin minimumin e detyrave ose nuk do kishin penguar individin e fortë shqiptar, situata do ishte ‘Mos e zot’ përpara,” përfundoi analisti.

/rtsh.al/