Presidenti amerikan Donald Trump pritet të njoftojë sot një plan të ri për furnizimin e Ukrainës me armë ofensive, në një ndryshim të dukshëm të qëndrimit që ka mbajtur deri më tani ndaj luftës Rusi-Ukrainë, raportoi Axios duke cituar dy zyrtarë amerikanë.

“Do t’u dërgojmë raketa Patriot, të cilat u duhen me dëshpërim”, tha Trump, pak javë pasi SHBA pezulloi dërgesat e disa armëve drejt Kievit, për të garantuar rezerva të mjaftueshme për forcat amerikane.

Ai sqaroi se sasia ende nuk është vendosur, por konfirmoi se “do t’i kenë, sepse kanë nevojë për mbrojtje”.

Armët do të vijnë përmes shteteve evropiane anëtare të NATO-s dhe sipas Trump, do të “paguhen 100%”.

Trump u shpreh i “zhgënjyer” nga presidenti rus Vladimir Putin, duke thënë se “flet bukur ditën, por bombardon natën”, duke e quajtur këtë sjellje problematike.

Keith Kellogg, i dërguari i posaçëm për Ukrainën, do të vizitojë sot Kievin, ndërsa Trump planifikon një takim me Sekretarin e Përgjithshëm të NATO-s, Mark Rutte, ku pritet të bëjë një “njoftim të rëndësishëm për Rusinë”.

/rtsh.al/