Turneu i Përfaqësueseve Rajonale u mbyll me sukses sot në “Shtëpinë e Futbollit”, ku u zhvilluan dy finalet për grupmoshat U-12 dhe U-13.

Fitues të turneut u shpallën ekipet përfaqësuese rajonale të Lezhës për të dyja grupmoshat, 2012 dhe 2013.

Finalja e kategorisë 2012 përballi përfaqësueset rajonale të Lezhës dhe Fierit, duke u mbyllur me fitoren minimale 1-0 për Lezhën. Ndërsa në finalen e kategorisë 2013, Lezha triumfoi sërish ndaj Fierit me rezultatin 2-1.

Pjesë e turneut të përfaqësueseve rajonale për ekipet e moshave U-12 dhe U-13 ishin të gjitha ekipet rajonale nga Fieri, Durrësi, Elbasani, Gjirokastra, Tirana, Korça, Shkodra dhe Lezha

Turneu rajonal u organizua nga Federata e Futbollit në bashkëpunim me të gjitha shoqatat rajonale të futbollit dhe kishte si synim kryesor evidentimin e talenteve të rinj që aktivizohen në kampionatet rajonale të organizuara nga FSHF.

Pas përfundimit të ndeshjeve finale, fëmijët vizituan muzeun në “Shtëpinë e Futbollit”, ku u njohën me historinë e pasur të futbollit shqiptar.