Udhëheqësi i ri suprem i Iranit, Mojtaba Khamenei, ka publikuar mesazhin e tij të parë që nga emërimi në postin më të lartë të vendit. Mesazhi u transmetua në televizionin shtetëror iranian, ndërsa ai nuk është shfaqur ende në publik që nga shpallja e emërimit të tij.

Në deklaratën e tij, Khamenei bëri thirrje për unitet mes popullit iranian dhe paralajmëroi se Ngushtica e Hormuzit, një nga rrugët më të rëndësishme për transportin global të naftës, do të mbetet e mbyllur si një “mjet presioni”.

Ai paralajmëroi gjithashtu se bazat amerikane në rajon duhet të mbyllen, duke shtuar se në të kundërt “do të sulmohen”.

Në mesazhin e tij, udhëheqësi iranian theksoi se Irani synon të ruajë marrëdhënie miqësore me vendet fqinje, por sipas tij, objektiv i veprimeve të Teheranit janë bazat amerikane të vendosura në këto shtete.

Deklarata vjen në një moment tensionesh të larta në rajonin e Lindjes së Mesme dhe rritjes së përplasjes mes Irant dhe SHBA-së.

/rtsh.al/