Një port në jug të Rusisë është goditur nga një sulm i madh me dron gjatë natës, duke shkaktuar dëme të konsiderueshme në infrastrukturë.

Guvernatori i rajonit të Krasnodarit, Veniamin Kondratyev, tha se sulmi ndodhi në portin e Tamanit, ku shpërthyen disa zjarre.

Sipas tij, janë dëmtuar një rezervuar nafte, një depo dhe terminale të ndryshme, ndërsa dy persona u plagosën dhe u dërguan në spital.

Dëme janë raportuar edhe në disa fshatra përreth zonës së portit.

Ky sulm, i cilësuar si “masiv” nga autoritetet lokale, vjen në kuadër të intensifikimit të operacioneve ukrainase kundër objektivave strategjike ruse, duke synuar dobësimin e kapaciteteve logjistike dhe energjetike të Moskës.

Ndërkohë, Sekretari i Shtetit i SHBA-së, Marco Rubio, ndau një përditësim nga takimi i tij me Presidentin ukrainas Volodymyr Zelenskyy, i zhvilluar në kuadër të Konferencës së Sigurisë në Mynih. Rubio tha se bisedimet u fokusuan tek siguria e Ukrainës dhe thellimi i partneriteteve në fushën e mbrojtjes dhe ekonomisë.

“Presidenti Trump dëshiron një zgjidhje që i jep fund gjakderdhjes një herë e përgjithmonë,” theksoi Rubio, duke shtuar se çështjet që mbeten për t’u zgjidhur janë të pakta, por ndër më të vështirat. Ai shprehu dyshime nëse Rusia është e gatshme të përfundojë luftën, megjithëse sipas tij “ata thonë se po”.

Met with Ukrainian President @ZelenskyyUa on Ukraine's security and deepening defense and economic partnerships. President Trump wants a solution that ends the bloodshed once and for all. pic.twitter.com/DUAbiAMkhd

— Secretary Marco Rubio (@SecRubio) February 14, 2026

/rtsh.al/