Në muajin qershor në Padovë të Italisë u ekzekutua ish-polici i burgjeve në Shqipëri, Fatos Cenaj, ndërsa këtë të diel autoritetet italiane konfirmuan se ai është vrarë për hakmarrje.

Të dhënat nga mediet italiane konfirmojnë se 58-vjeçari Cenaj u vra për hakmarrje nga një person që hetuesit italianë tashmë e akuzojnë për vrasje me paramendim. 

Ekspertët e grupit hetimor kanë administruar qindra orë pamje filmime të kamerave të sigurisë dhe kanë marrë dëshmitë e dhjetëra personave, ndërsa kanë arritur në konkluzionin se vrasja ishte planifikuar.

Pistat hetimore të ngritura nga ekspertët i kanë sjellë ata në Shqipëri, ku mendohet të ketë lindur shkaku i kësaj hakmarrjeje të mundshme.

Ngjarja e rëndë ndodhi mëngjesin e 8 qershorit, teksa Cenaj po shkonte në punë si çdo mëngjes, kur ai u gjet i vrarë. Fillimisht u mendua për ngjarje aksidentale, por në spital mjekët zbuluan një plagë plumbi në kokë. 

Fatos Cenaj ishte ish-punonjës burgu në Shqipëri, ndërsa autori i vrasjes është identifikuar, por ende nuk është kapur nga policia.

Gazetare: Flutura Tota

/rtsh.al/