Gjykata e Tiranës ka dënuar me 16 vite burg Mario Perlleshajn, autorin e vrasjes së Martin Canit dhe plagosjen e Luis Meçjas, ngjarje kjo e regjistruar në nëntor 2024 pranë shkollës “Fan Noli”.

Mario Përlleshaj është dënuar me 12 vite për vrasjen e Martin Canit dhe 10 vite për tentativën e vrasjes së Luis Meçes, por në bashkim të dënimeve, përfundimisht u dënua me 16 vite heqje lirie.

Prokuroria e Tiranës kërkoi dënimin me 25 vite burgim për veprën penale “Vrasje në rrethana cilësuese kundër dy ose më shumë personave” ndaj Mario Përlleshajt, ndërsa Gjykata ka vendosur sot dënimin e tij me 16 vite burg.

Kujtojmë se ngjarja e rëndë ndodhi vetëm disa metra larg ambienteve të shkollës. Konfrontimi mes adoleshentëve kishte nisur disa ditë para krimit. Konflikti vijoi sapo fëmijët lanë ambientin shkollor, duke kulmuar me vrasjen e Martin Canit. Edhe vetë autori i dyshuar, Përlleshaj, mbeti i plagosur nga përleshja.

/rtsh.al/