Autori i vrasjes së 48-vjeçarit Artur Cangu në Fushë Krujë, dha dëshminë e parë përpara grupit hetimor, ku rrëfeu gjithë dinamikën e ngjarjes.

Burimet e Policisë së Tiranës bëjnë me dije se Eduart Afmataj deklaroi se, fillimisht mes tyre ka pasur një konflikt verbal, ku më pas, sipas tij, Cangu e ka goditur me një kosë të vogël në krah.

Pas kësaj, Eduard Afmataj ka deklaruar se ka marrë çiften dhe e ka qëlluar 48-vjeçarin, duke e lënë të vdekur.

Konflikti, sipas dëshmisë së autorit të dyshuar, ka ndodhur në tokën e viktimës në Vrion të Niklës.

Menjëherë pas krimit të kryer, ky i fundit ka lajmëruar Policinë duke i treguar për krimin e kryer dhe më pas është larguar.

Afmataj u arrestua pa u mbushur 24 orë nga ngjarja në vendin e quajtur Bruz Mal në Malësi Krujë ndërsa ishte fshehur në këtë zonë të thellë.

Sipas burimeve, në momentin e arrestimit Afmataj nuk ka bërë rezistencë ndaj forcave të Policisë ndërsa arma e krimit ende nuk është gjetur.

Po sipas grupit hetimor, mes autorit dhe viktimës prej një viti kishte një konflikt për një pronë.

/rtsh.al/