Menjëherë pas mbylljes zyrtare të qendrave të votimit, procesi zgjedhor në Bashkinë Mat ka hyrë në fazën thelbësore të dorëzimit dhe numërimit të votave. Ka nisur dërgimi i kutive të votimit drejt Komisionit të Zonës Administrative Zgjedhore (KZAZ).

Kutitë e para, që mbajnë votat e qytetarëve për kryetarin e ri të Bashkisë, kanë mbërritur në ambientet e KZAZ-së, së bashku me dokumentacionin shoqërues. Anëtarët e komisionit kanë filluar procedurën e marrjes në dorëzim.

Dorëzimi i kutive të votimit pason një ditë votimi e cila, sipas raportimeve, ka kaluar përgjithësisht e qetë.

Pas përfundimit të dorëzimit dhe verifikimit të të gjithë materialit zgjedhor, do të fillojë procesi i numërimit, moment kur vëmendja e publikut dhe e kandidatëve zhvendoset plotësisht te KZAZ-ja, e cila do të përcaktojë fituesin e garës për kreun e Bashkisë Mat.

/rtsh.al/