Në një atmosferë të ngrohtë dhe plot kujtime, shtëpia-studio “Agolli” festoi mbrëmë njëvjetorin e hapjes si muze, duke sjellë për publikun një ekspozitë të rrallë kushtuar një prej kryeveprave të letërsisë shqiptare  romanit “Shkëlqimi dhe rënia e Shokut Zylo”.

Në këtë aktivitet, për herë të parë u publikua një pjesë e dorëshkrimit origjinal të romanit, si edhe blloqe shënimesh që zbulojnë gjenezën e personazhit legjendar.

Ekspozita përfshiu gjithashtu ekzemplarin e revistës “Hosteni” të vitit 1972, ku vepra u botua fillimisht, letërkëmbime të Dritëroit mbi romanin, objekte personale, portrete origjinale dhe fotografi të rralla të shkrimtarit.

“Ne kemi zgjedhur ta shënojmë këtë ditëlindje të Dritëroit dhe këtë 1-vjetor të shtëpisë-muze të Dritëroit përmes një ekspozite të veçantë, e cila i kushtohet romanit Shkëlqimi dhe rënia e Shokut Zylo në shumë dimensione. Kemi sjellë një pjesë të dorëshkrimit të tij, shumë letërkëmbime që kanë lidhje posaçërisht me këtë vepër themelore të letërsisë shqipe”, tha drejtuesja e Shtëpisë Studio “Kadare-Agolli” Anisa Ymeri.

“Muzeu i Agollit ka shumë dashuri brenda vetes, ashtu sikurse edhe vetë Dritëroi e kishte këtë dashuri për njerëzit, dëshirën për të bashkuar njerëz”, u shpreh pedagogia Anila Mullahi.

Ky aktivitet shënoi jo vetëm një moment reflektimi mbi trashëgiminë e Dritëro Agollit, por edhe një mënyrë për të rikthyer në vëmendje një nga personazhet më të njohur satirikë të letërsisë shqipe Qe mbetet aktuale, si dëshmi e ironisë fine dhe e një kohe që vijon të flasë përmes letërsisë.

Gazetare: Xhilda Kondi

/rtsh.al/