Magnus Brunner, Komisioneri Evropian për Çështjet e Brendshme dhe Migracionin, beson se Bashkimi Evropian duhet të mbetet i gatshëm të negociojë me udhëheqësin pro-rus libian Khalifa Haftar për të parandaluar që udhëheqësi rus Vladimir Putin të përdorë migracionin si armë.

Brunner vuri në dukje se ndikimi në rritje i Rusisë në Libi është një çështje shqetësuese për BE-në, prandaj është e nevojshme të angazhohet me vendin.

“Sigurisht që ekziston rreziku që Rusia…do të përdorë migrantët dhe çështjen e migracionit në tërësi si armë kundër Evropës. Ky përdorim si armë po ndodh dhe sigurisht që kemi frikë se Rusia synon të bëjë të njëjtën gjë me Libinë”, tha Brunner.

Komentet e Brunner tregojnë qëllimin e BE-së për të rifilluar bisedimet me Haftarin, pavarësisht paralajmërimeve të udhëheqësve evropianë kundër bashkëpunimit me komandantin ushtarak.

Komandanti ushtarak kontrollon Ushtrinë Kombëtare Libiane dhe drejton Libinë lindore si një diktaturë ushtarake, duke rritur bashkëpunimin e tij me Putinin.

Fokusi i BE-së është te frika se Putini do t’i bëjë Libisë atë që është përpjekur tashmë të bëjë në disa pjesë të Evropës Lindore, ku zyrtarët e BE-së thonë se ai po zhvillon një luftë hibride që përfshin përdorimin e migracionit si armë, transmeton Politico.

Vendet e BE-së akuzojnë Minskun dhe Moskën për lehtësimin e kalimeve të paligjshme të kufijve nga refugjatët përmes Polonisë dhe Lituanisë.

Kjo taktikë synon të bëjë presion mbi qeveritë evropiane duke mbjellë mosmarrëveshje politike dhe duke rritur mbështetjen për partitë anti-imigracion, shpesh pro-ruse.

Brunner tha se rreziku i ndikimit të Putinit në Libi nuk i lë Evropës zgjidhje tjetër përveçse të zhvillojë bisedime me Haftarin dhe “të vendosë opsionet tona në tryezë kur bëhet fjalë për diplomacinë e migracionit”.

/rtsh.al/