Qeveria e Malit të Zi është zotuar edhe një herë të përshpejtojë luftën kundër krimit të organizuar, pas një shpërthimi vdekjeprurës të enjten që i atribuohet nga policia një larjeje hesapesh midis grupeve kriminale rivale.

Si pjesë e ofertës së saj për anëtarësim në Bashkimin Evropian, autoritetet malazeze kanë premtuar në mënyrë të përsëritur se do të trajtojnë korrupsionin dhe krimin e organizuar që rrënojnë këtë vend të vogël ballkanik.

Këshilli i Sigurisë Kombëtare deklaroi se kishte miratuar një sërë masash, me synimin për një “përgjigje urgjente dhe vendimtare për forcimin e luftës kundër krimit të organizuar”, por pa i detajuar ato.

”Lufta kundër krimit të organizuar kërkon një përgjigje të përbashkët dhe vendimtare”, tha qeveria në një deklaratë.

Mbledhja e Këshillit të Sigurisë Kombëtare erdhi një ditë pas një shpërthimi – i cili la dy të vdekur dhe tre të plagosur – pranë një qendre sportive në Cetinje.

”Dy personat e vrarë ishin anëtarë të një grupi të organizuar kriminal”, tha drejtori i policisë së Malit të Zi, Aleksandar Radoviç.

Sipas medias vendase, viktimat ishin anëtarë të klanit ”Skaljari”, një nga më me ndikim në Mal të Zi.

Vendi i vogël, bregdeti adriatik i të cilit është i populluar nga rusët dhe turistët, sheh grupe të shumta mafioze që përleshen.

Cetinja, një ish-kryeqytet mbretëror i ndërtuar në male, është një nga bastionet e këtyre grupeve kriminale, të cilat qeveria nuk është në gjendje t’i shpërndajë – pavarësisht presionit nga Bashkimi Evropian.

/ rtsh.al /