Ishte vetëm 20 vjeç, kur Kristiani nga fshati Pistull i Vaut të Dejës, vendosi që të shtojë numrin e lopëve që mbarështonte. Nga 3 krerë që familja i mbante për nevojat e tyre 8 vite më parë, sot në mini fermën e tij numërohen rreth 30 të tilla.

“E kam nisur me 3 krerë para 7-8 viteve, nuk kam emigruar asnjëherë jashtë dhe kam investuar këtu”, tha Kristiani.

Kristiani është përfitues prej vitesh në skemat e subvencioneve, ndërkohe që pret certifikatën e pronësisë për të ndërtuar fermën e re, pasi stalla ekzistuese është tejet e vogël për qëllimet që i riu ka.

“Dëshira ime është për ta shtuar sa më shumë, është biznes fitim prurës”, tha ai.

Drejt bashkëmoshatarëve të tij, Kristiani apelon.

“Më mirë është vendi jonë për të kontribuar edhe jashtë nuk është fushë me lule”, tha Kristiani.

Qumështin e prodhuar familja Hila e shet tek një sipërmarrës i zonës. Synimi i Kristianit është që në vitet e ardhshme të ketë të paktën 100 krerë, duke u kthyer në një nga fermerët më të rëndësishëm të zonës.

/RTSH/