Gjatë vizitës së saj në Tiranë, përfaqësuesja e Lartë e Politikës së Jashtme të Bashkimit Evropian, Kaja Kallas, mori pjesë në takimin e parë të Dialogut Shqipëri-BE për Sigurinë dhe Mbrojtjen.

Agjencia për Media dhe Informim, nëpërmjet një njoftimi për shtyp të bërë në rrjetet sociale bëri të ditur se në këtë takim zëvendësministrja, Megi Fino u shpreh se “partneriteti me Bashkimin Evropian për sigurinë dhe mbrojtjen përfshin ndër të tjera edhe angazhimin e qeverisë shqiptare kundër kërcënimeve hibride dhe manipulimit të informacionit nga shtetet e huaja, që udhëhiqet nga negociatorja e kapitullit 31 të negociatave të anëtarësimit”.

Ndërsa drejtori i Përgjithshëm i Agjencisë për Media dhe Informim, Alteo Hysi, prezantoi përpjekjet e koordinuara mes MEPJ, MIA dhe AKSK për forcimin e qëndrueshmërisë ndaj kërcënimeve të kësaj natyre.

/rtsh.al/