Policia e Korçës ka vendosur në pranga vëllain e kandidatit për deputet të Partisë Demokratike, Bledion Nallbati, pasi akuzohet për dhunë ndaj një shoferi kamioni, ngjarje e ndodhur mbrëmjen e djeshme.

Sipas policisë, specialistët për Hetimin e Krimeve në Komisariatin e Policisë Devoll në përfundim të “veprimeve të kryera në lidhje me një konflikt të ndodhur mbrëmjen e djeshme në rrethrrotullimin e  Bilishtit, arrestuan në flagrancë shtetasin A. N.  42 vjeç, banues në Devoll, për veprat penale “Dëmtime të tjera me dashje”, “Prishja e qetësisë publike”, dhe ” Pengimi i qarkullimit të mjeteve të transportit”.

Arrestimi i vëllait të kandidatit Nallbati u bë pasi u kap në flagrancë menjëherë pas konfliktit të ndodhur midis shtetasve A.N, B.N dhe shoferit të një kamioni transporti shtetasi S.D.

“Gjatë këqyrjes së pamjeve filmike dhe kryerjes se veprimeve të tjera hetimore, rezultoi se më datë 03.05.2025, rreth orës 21:15 ,  në  afërsi  të rrethrrotullimit të Mirasit  në qytetin e Bilishtit  shtetasi A.N, ka  ndaluar automjetin  me të cilin lëvizte bashkë me vëllanë e tij shtetasin B.N (kandidat për deputet i një subjekti politik) duke penguar qarkullimin e automjeteve që lëviznin në këtë aks rrugor”, thuhet në njoftimin e policisë.

Ndërkaq, duke iu referuar dinamikës së ngjarjes, policia shpjegon se shtetasi A.N ka dalë nga automjeti dhe ka debatuar verbalisht me  një drejtues kamioni, dhe më pas ka tentuar ta zbresë me forcë nga kamioni shtetasin S.D, dhe ka tentuar ta qëllojë me grushte si dhe ta ofendojë duke kryer veprime të pa hijshme në publik.

Referuar pamjeve filmike, në këtë konflikt është përfshirë  edhe vëllai i  tij, Bledion Nallbati ku fillimisht ka tentuar të qetësojë situatën por më pas ka tentuar të zbresë me forcë  nga kamioni shtetasin S.D.

Më tej policia thekson se materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.

/rtsh.al/