Kryeministri në detyrë, Albin Kurti ka kujtuar 620-vjetorin e lindjes së Gjergj Kastriotit – Skënderbeut.

Ai e ka cilësuar atë si një nga figurat më të mëdha ushtarake dhe politike të Evropës mesjetare dhe si shtyllë themelore të identitetit kombëtar shqiptar.

“Gjergj Kastrioti ka lindur para 620 vitesh, me shumë gjasë në një ditë sikur sot, në Ditën e Shën Gjergjit, siç na bën të besojmë emri i tij, prej nga mund të jetë pagëzuar “Gjergj”, sipas traditave mesjetare të krishtera”, ka shkruar Kurti në Facebook.

Kurti e ka vlerësuar Gjergj Kastriotin si një nga figurat më të njohura ushtarake dhe politike në Evropë, në shekullin e fundit të epokës së mesjetës.

“Për një çerekshekulli, ai i priu kryengritjes dhe rezistencës kundërosmane të arbërve, duke dhënë shembull se si luftohet për liri, atdhe dhe bashkim politik. Ndër shekuj, emri i Gjergj Kastriotit – Skënderbeut, u bë referencë për strategji ushtarake, ideale politike, guxim në veprime dhe konsistencë në rezistencë”, ka shkruar Kurti.

Ai ka shpërndarë edhe një portret të realizuar më 1533 nga artisti gjerman Hans Weiditz, gravurë kjo që ilustronte botimin e parë në gjuhën gjermane të biografisë për Skënderbeun, shkruar nga Marin Barleti.

“Skënderbeu është shqiptari për të cilin është shkruar më së shumti në histori dhe njëri nga personalitetet historike në përgjithësi për të cilin janë shkruar më së shumti libra. Në historinë e kombformimit te shqiptarët, figura e Skënderbeut është një nga shtyllat mbi të cilat është ngritur dhe qëndron kombi shqiptar. Gjergj Kastrioti ishte hero për së gjalli dhe do të mbetet heroi kombëtar i shqiptarëve në të gjitha kohërat. U kujtoftë dhe u nderoftë me lavdi Skënderbeu ndër breza!”, shkruan Kurti ndër të tjera në Facebook.

/rtsh.al/