Fundi i ndeshjes ka qenë i hidhur për ekipin e Barcelonës pasi më shumë se një përfaqësues i skuadrës u ankuan përpara kamerave për mënyrën se si kryesori Szymon Marciniak gjykoi takimin.

Hansi Flik akuzoi polakun pas takimit se të gjitha vendimet e vështira apo që konsiderohen si 50/50 i mori në favor të ekipit zikaltër. Madje shtypi spanjoll braktisi “diplomacinë” duke fajësuar “madridistin” Marciniak për penallti të mohuara dhe për vendime të njëanëshme.

Por ndeshja përveç rezultatit të përgjithshëm 7-6 ofron një të dhënë që ka nevojë për intepretim dhe mbase nxjerr ekipin katalan si një humbës që nuk pranon realitetin. Në harkun e dy duleve, ku për të vendosur fituesen u deshën plot 210’ lojë, skuadra e drejtuar nga Simone Inzagi ka qenë në disavantazh vetëm për gjashtë minuta. Në takimin e kthimit Barcelona ka shijuar avantazhin vetëm nga minuta e 87’ kur shënoi Rafinja deri në në të 93’ kur abrazoi Açerbi.