Renaldo Kaja është një nga fermerët e rinj të Lushnjës që zgjodhi të mos ikë jashtë, por të punojë tokën në vendin e vet. Pas një viti të tërë përpjekjesh, ai është i zhgënjyer, pasi çmimi i shalqinjve ka rënë në vetëm 10 lekë për kilogram dhe nuk e justifikon as harxhin e ujit për ta vaditur. Për këtë arsye, Renaldo thotë se do ta lërë në arë pa e vjelë.

“Malli na ka mbetur nëpër parcela dhe nuk po na e marrin sepse është bërë monopol”, u shpreh fermeri.

Fermerët fajësojnë pikat e grumbullimit, të cilat sipas tyre kanë mbjellë vetë qindra hektarë shalqinj dhe nuk blejnë më prodhimin  e fermerëve të vegjël. Për këtë arsye, prodhuesit në fshatrat Imshtë dhe Halilaj tentuan të protestojnë për të sensibilizuar rreth  për situatës, por u penguan.

“Pikat e grumbullit kanë mbjellë sipërfaqe me shalqi, filluan të mbledhin shalqirin e fermerëve kur ishin në krizë dhe tani që po marrin prodhimin e tyre po e eksportojnë dhe ne kanë lënë pezull”, tha ai.

Këta prodhues kërkojnë ndërhyrjen e strukturave të shtetit për të kontrolluar abuzimet mbi çmimet e shitjes së produkteve të stinës. Sipas fermerëve jo vetëm shalqiri por edhe specat, domatet, kastraveci janë ulur në 10 lekë për kilogramë.

Fermerët kërkojnë të takohen me përfaqësuesit e institucioneve për të biseduar mbi situatën e çmimeve dhe për të kuptuar arsyen e rënies së menjëhershme nën koston e prodhimit.

/rtsh.al/