Një aksident i rëndë me një viktimë dhe disa të plagosur ndodhi të mërkurën paradite në Levan të Fierit.

Dy automjete, njëra veturë dhe tjetra fuoristradë, po lëviznin në të njëjtin drejtim, kur u përplasën me njëra-tjetrën në rrethrrotullimin që lidh bajpasin e Fierit me Levanin dhe dy autostradat e jugut të vendit. Shkak dyshohet të jetë bërë humbja e kontrollit nga drejtuesit i mjetit fuoristradë, që lëvizte pas veturës.

Si pasojë e përplasjes së fortë, njëri nga mjetet përfundoi në kanalin e rrugës. Drejtuesi i veturës, 51-vjeçari Luftar B. mbeti i vdekur nga goditja, ndërsa bashkëshortja e tij ndodhet në spital jashtë rrezikut për jetën. Ndërkohë tre shtetasit që udhëtonin në fuoristradë, së bashku me drejtuesin e mjetit, u dërguan me lëndime në spitalin e Fierit, ku thuhet se janë në gjendje të qëndrueshme shëndetësore.

Burime nga Policia Rrugore thanë se drejtuesi i mjetit fuoristradë deklaroi se humbi ndjenjat për shkak të një problemi shëndetësor.

“Rreth orës 11:00, në vendin e quajtur “Rotondo e Levanit”, automjeti me drejtues shtetasin I. P., është përplasur me automjetin me drejtues shtetasin L. B., 51 vjeç. Si pasojë e përplasjes ka humbur jetën shtetasi L. B. dhe kanë shkuar në spital për të marrë mjekim shtetasi I. P. dhe katër pasagjerë“, njoftoi Policia.

Grupi hetimor po punon për zbardhjen e dinamikës së këtij aksidenti të rëndë me pasoja fatale.

Gazetare: j.k. / Laureta Roshi

/rtsh.al/