Autorët e atentatit të mbrëmjes së shkuar në Shkodër ende mbeten në arrati dhe grupi hetimor nuk ka mundur që të identifikojë se kush ishin ata që qëlluan ndaj 34-vjeçarit Kristian Kola.

Bëhet fjalë për vrasjen e regjistruar në qendër të qytetit, një nga zonat më të frekuentuara, por pritet që kamerat e sigurisë në zonë të ndihmojnë grupin hetimor për të përftuar imazhe të të gjithë personave që e kanë frekuentuar zonën në momentin e ngjarjes, para apo pas saj.

34-vjeçari ishte duke pirë kafe, kur dy autorë qëlluan në drejtim të tij duke e lënë të vdekur në vend. Autorët ishin me motor dhe skafandra në kokë, kur u afruan dhe e qëlluan disa herë. Ata u larguan nga vendi i ngjarjes pa lënë gjurmë, ndërsa plumbat e kapën të riun në pjesën e kraharorit.

Të dhënat e policisë së Shkodrës bëjnë të ditur se 34-vjeçari nuk rezulton person me precedentë të mëparshëm kriminalë, por dyshohet se më herët ka qenë autor i një plagosjeje.

Blutë e Shkodrës po marrin edhe dëshminë e personave që mund të kenë qenë brenda në lokal në momentin e atentatit, si dhe ata që ishin jashtë, ku po pinte kafe edhe viktima.

Gazetare: Flutura Tota

/rtsh.al/