Një pjesë e Terminalit 4 të Aeroportit të Heathrow-t në Londër është evakuuar për shkak të shqetësimeve për një material të mundshëm të rrezikshëm.

Sipas një zëdhënësi të aeroportit, zona e check-in-it në Terminalin 4 është mbyllur dhe evakuuar ndërsa shërbimet e emergjencës po i përgjigjen incidentit.

Turma pasagjerësh me bagazhe janë parë jashtë terminalit teksa zjarrfikësit ndërhynë në vendngjarje.

Brigada e Zjarrfikësve të Londrës deklaroi se evakuimi është bërë si masë paraprake. Aeroporti u ka kërkuar pasagjerëve të mos udhëtojnë drejt Terminalit 4, ndërsa të gjitha terminalet e tjera po funksionojnë normalisht.

Sipas mediave angleze, një burim raportoi se incidenti ndodhi në zonën para kontrollit të sigurisë (landside), dhe u përmend fjala “kimik” nga një dëshmitar në një video të shpërndarë në rrjetet sociale, por detaje të sakta për natyrën e materialit nuk janë konfirmuar zyrtarisht.

Zona e check-in-it u mbyll, dhe trenat e National Rail dhe Heathrow Express nuk ndaluan në Terminalin 4 gjatë incidentit.

Operacionet në zonën pas kontrollit të sigurisë (airside) vijuan normalisht. Aeroporti u këshilloi pasagjerëve të mos udhëtonin drejt Terminalit 4 derisa situata të sqarohej. Të gjitha terminalet e tjera (2, 3 dhe 5) vazhduan të funksiononin normalisht.

Aeroporti kërkoi falje për shqetësimin dhe theksoi se siguria e pasagjerëve dhe stafit mbetet prioriteti kryesor.

Ky incident vjen pas ngjarjeve të mëparshme në Heathrow, si mbyllja e aeroportit në mars 2025 për shkak të një zjarri në një nënstacion elektrik, që shkaktoi anulimin e mbi 1,300 fluturimeve dhe kaos global në udhëtime.

/rtsh.al/