Ndalim të rrjeteve sociale për fëmijët nën moshën 15-vjeçare ka rekomanduar raporti i publikuar nga një komision hetimor parlamentar në Francë mbi efektet psikologjike të TikTok tek të miturit.

Kjo masë e mbështetur tashmë edhe nga Presidenti Emmanuel Macron, synon të rrisë ndërgjegjësimin e familjeve dhe të rinjve  rreth rreziqeve të platformave të mediave sociale siç është edhe TikTok, të cilat përdoren gjerërisht nga adoleshentët.

“Kjo nuk është një çështje e parëndësishme”, tha deputetja Laure Miller, raportuese për komitetin hetimor, duke theksuar rëndësinë e mbrojtjes së të rinjve nga efektet negative të medieve sociale.

“Ne në Francë duhet të jemi në gjendje të marrim sërish kontrollin mbi jetën e të rinjve tanë dhe mbi jetën tonë”, u shpreh ajo.

Rekomandimet përfshijnë gjithashtu vendosjen e një ore policore digjitale duke i bërë mediat sociale të paarritshme nga ora 22:00 deri në orën 08:00 të mëngjesit.

Masat përfshijnë edhe prindërit, ata do të përballen me “krimin e neglizhencës digjitale” dhe do të vihen para përgjegjësisë nëse nuk monitorojnë përdorimin e mediave sociale nga fëmijët e tyre.

Propozimet e fundit vijnë pas hetimeve të  nisura që nga muaji mars nga komisioni hetimor parlamentar, pasi 7 familje ngritën padi kundër TikTok në vitin 2024.

Ato e akuzuan platformën e medieve sociale se i ekspozon fëmijët e tyre ndaj përmbajtjes së dëmshme, veçanërisht të lidhur me vetëvrasjen.

Gazetare: Vjollca Zharri

/rtsh.al/