Ish-kryeministri dhe njëherësh kreu i Partisë Demokratike, Sali Berisha ka akuzuar maxhorancën socialiste se po “shkelmon” Kushtetutën, pas kërkesës së PS-së për ndryshimin e rregullores së Kuvendit, për ristrukturimin e komisioneve të përhershme parlamentare.

“Shkelmimi i Kushtetutës, është shkelmim i vullnetit të qytetarëve shqiptarë të të gjithë spektrit, shkelmimi i Kushtetutës është një puç që i bëhet librit të shtetit, vetëm e vetëm se ju doni me shpejtësi të lani duart si Ponç Pilati pas krimit që kryeni.

Si ka mundësi, a keni ju, çfarë të thuash, njerëz që lexojnë Kushtetutën? A ke ti këshilltarë që paguan që të të lexojnë ty Kushtetutën dhe rregulloren e parlamentit, e cila për parlamentin është Kushtetuta e parlamentit, është ligji më i rëndësishëm i vendit, pas Kushtetutës. Pra, aq peshë sa ka parlamenti në jetën e një shteti dhe të vendit”, u shpreh Berisha.

Nga foltorja e Kuvendit, Berisha hodhi akuza edhe në drejtim të kryetarit të Kuvendit, Niko Peleshi.

“Nuk je gjë tjetër, vetëm një sekretar mjeran i kreut të organizatës kriminale të Shqipërisë, që e ka emrin Edi Rama”, tha Berisha.

Mes debatesh Kuvendi miratoi me votat e mazhorancës ndryshimet në rregulloren e Kuvendit, duke rritur numrin e komisioneve të përhershme parlamentare nga 8 në 11, 7 prej të cilave e ka drejtimin mazhoranca dhe 4 do të drejtohen nga opozita.

Futja në Kuvend me procedurë të përshpejtuar e ndryshimeve të rregullores së Kuvendit, solli përplasje mes opozitës e mazhorancës. Demokratët kundërshtuan miratimin e këtyre ndryshimeve pa gjithëpërfshirje, duke e konsideruar si shkelje të Kushtetutës. Nga ana e saj, mazhoranca argumentoi se ndryshimet janë të domosdoshme për rritjen e efikasitetit në punën parlamentare.

/rtsh.al/