Ambasadori gjerman në Tiranë, Karl Bergner, theksoi rëndësinë e një procesi të drejtë dhe të pandikuar nga jashtë për zgjedhjen e kreut të ri të Prokurorisë së Posaçme.

Ambasadori Bergner kërkoi që gjyqësori të tregojë në këtë proces që është i pavarur, një kriter kyç i sundimit të ligjit dhe procesit të integrimit të vendit.

Duke vlerësuar rolin e Altin Dumanit, ambasadori Bergner tha se SPAK arriti kontribute të jashtëzakonshme në luftën kundër krimit dhe korrupsionit në vend.

“Në vitet e fundit, nën udhëheqjen e Altin Dumanit, SPAK ka dhënë kontribute të jashtëzakonshme në luftën kundër korrupsionit dhe krimit të organizuar në Shqipëri. Besimi i madh i popullsisë shqiptare dhe partnerëve ndërkombëtarë të Shqipërisë në punën e SPAK e thekson në mënyrë mbresëlënëse këtë.

Procesi i nisur sot nga Këshilli i Lartë i Prokurorisë për të zgjedhur kreun e ardhshëm të SPAK duhet të jetë transparent, i bazuar në meritë dhe i lirë nga ndikimi i jashtëm.

Pavarësia e gjyqësorit, e cila duhet të demonstrohet në procesin e nisur sot, por edhe në veprimet e përditshme të organeve ekzekutive dhe legjislative, është një kriter kyç për Gjermaninë në lidhje me sundimin e ligjit dhe nivelin e përgatitjes së Shqipërisë për anëtarësim në BE”, u shpreh ambasadori.

Këshilli i Lartë i Prokurorisë hapi zyrtarisht garën për kreun e ri të Prokurorisë së Posaçme, tre muaj para përfundimit të mandatit të drejtuesit aktual Altin Dumani.

KLP ka vendosur një afat 3-javor për paraqitjen e dokumentacionit të kandidatëve, deri më 8 tetor 2025. Drejtuesi i ri i Prokurorisë së Posaçme do të zgjidhet mes prokurorëve ekzistues të SPAK-ut për një mandat 3-vjeçar pa të drejtë rikandidimi.

Mes kandidatëve të mundshëm, të cilët janë pjesë e SPAK-ut aktualisht dhe kanë mundësinë që të konkurrojnë, janë:

1. Adnan Xholi
2. Anita Jella
3. Alfred Shehu
4. Behar Dibra
5. Bledar Maksuti
6. Doloreza Musabelliu
7. Dorina Bejko
8. Dritan Prençi
9. Edvin Kondili
10. Elida Kaçkini
11. Elvin Gokaj
12. Ened Nakuçi
13. Enkeleda Millonai
14. Klodjan Braho
15. Manjola Kajana
16. Ols Dado
17. Sotir Kllapi
18. Vladimir Mara

/rtsh.al/