Rreth 70 punonjës të minierës së bakrit në Spaç të Mirditës janë ngritur në protestë prej tre ditësh, duke bojkotuar punën në shenjë pakënaqësie për kushtet e punës dhe pagat minimale.

Minatorët i kanë paraqitur një sërë kërkesash kompanisë koncesionare turke “Tete Albania”, por negociatat mes palëve kanë dështuar, duke thelluar tensionet në vendin e punës.

“Kërkojmë shumë të drejta të cilat që kur i kemi kontratat me kompaninë nuk i zgjidhim dot”, u shpreh një prej minatorëve.

“Kushtet janë të vështira, prania e tymit, prania e gazit etj.”, tha një minator tjetër.

Në mbështetje të protestës janë bashkuar edhe përfaqësues të Konfederatës së Sindikatave të Shqipërisë, të cilët kanë paralajmëruar nisjen e një greve urie pa afat nëse kërkesat e minatorëve nuk merren ne konsiderate.

“Kemi shpallur një grevë të përgjithshme e cila do të filloj në 7 mëngjesit dhe do të jetë pa afat”, theksoi Kol Nikollaj, president i KSSH.

Minatorët i kanë kërkuar ndërhyrje edhe Agjencisë Kombëtare të Punësimit, e cila ka ndërmjetësuar një takim mes palëve, por pa rezultat konkret.

Ndërkohë, kompania “Tete Albania”, e kontaktuar për këtë çështje, i ka cilësuar kërkesat e minatorëve si “antiligjore”, duke mohuar akuzat dhe pretendimet e ngritura ndaj saj.

Gazetare: Flutura Tota

/rtsh.al/