Ministrat e mjedisit të Bashkimit Evropian arritën një marrëveshje paraprake të mërkurën në mëngjes për një objektiv të ri klimatik për vitin 2040, pas më shumë se 18 orësh negociatash intensive mes vendeve anëtare.

Sipas marrëveshjes, BE synon të ulë emetimet e gazeve serrë me 90% krahasuar me nivelet e vitit 1990.

Megjithatë, për të lehtësuar zbatimin për vendet më skeptike, si Italia dhe Polonia, është rënë dakord që deri në 5% e këtij objektivi të përmbushet përmes kredive ndërkombëtare të karbonit.

Një tjetër 5% mund të shtohet më vonë, duke ofruar fleksibilitet shtesë.

Gjatë bisedimeve, Italia dhe Polonia kërkuan që 10% e objektivit të realizohej jashtë BE-së, me Italinë që këmbënguli që gjysma e kostove të mbuloheshin nga fondet e BE-së — një kërkesë që u kundërshtua nga vendet më ambicioze për klimën si Gjermania, Spanja dhe Suedia.

Marrëveshja pritet të miratohet zyrtarisht më vonë gjatë ditës dhe vjen në kohë për samitin ndërkombëtar të klimës COP30 në Brazil, ku Presidentja e Komisionit Evropian, Ursula von der Leyen, do të përfaqësojë bllokun.

Ky kompromis gjithashtu hap rrugën për një objektiv të ri global për vitin 2035, i cili do të kërkojë miratim unanim nga të gjitha vendet anëtare të OKB-së.

Negociatat u ndërprenë për pak kohë rreth orës 1:30 të mëngjesit, por rifilluan pas 40 minutash me sinjale për përparim. Konsultimet joformale vazhduan deri në orët e para të mëngjesit.

Më herët, disa vende kishin shprehur pakënaqësi ndaj presidencës daneze për mënyrën e menaxhimit të procesit, duke e akuzuar për pritshmëri jorealiste dhe lëshime të parakohshme.

/rtsh.al/