Për zgjedhjet e pjesshme vendore të 9 nëntorit, 29.092 qytetarë të Bashkisë Mat kanë të drejtë vote për të zgjedhur kryetarin e ri të bashkisë.

Procesi do të zhvillohet në 47 qendra votimi, të shpërndara në të gjithë territorin e bashkisë. Në garë për kryetar janë tre kandidatë: Altin Bojni, kandidat zyrtar i Partisë Socialiste; Suzana Pasha, kandidate e pavarur, ish-drejtuese e Forumit të Gruas Socialiste në Mat, dhe Eduart Brahilika kandidat i pavarur i mbështetur nga opozita.

Vakanca në Mat u krijua pasi kryetari i zgjedhur në 2023, Agron Malaj dha dorëheqjen pasi u zgjodh deputet më 11 maj duke lënë postin e bashkisë të lirë.

Në zgjedhjet e vitit 2023, Agron Malaj fitoi me 8,525 vota (66.11 %), ndërsa Skënder Gjuci nga koalicioni “Bashkë Fitojmë” mori 4,370 vota (33.89 %).

Votimi në 9 nëntor nisi në orën 07:00 dhe përfundon në 18:00 dhe do të monitorohet nga vëzhgues të KQZ-së dhe përfaqësues politikë për të garantuar korrektësi dhe transparencë.

/RTSH/