Një ditë pas dështimit të dytë të Lëvizjes Vetëvendosje për të formuar qeverinë e re, presidentja e Kosovës Vjosa Osmani po diskuton me liderët e partive parlamentare për të vendosur datën e zgjedhjeve të parakohshme.

Në takim morën pjesë kryetari i Vetëvendosjes Albin Kurti, lideri i Partisë Demokratike të Kosovës Bedri Hamza, kreu Lidhjes Demokratike të Kosovës Lumir Abdixhiku,  ai i Aleancës për Ardhmërinë e Kosovës  Ramush Haradinaj.

Gjithashtu të pranishm ishin kreu i Nismës Fatmir Limaj dhe kryetarët e dy partive Guxo dhe Alternativa Faton Peci e Mimoza Kusari-Lila. Edhe liderët e partive të komuniteteve joserbe morën pjesë në takim me Osmanin.

Të mërkurën, Glauk Konjufca, i mandatuari i dytë nga Lëvizja Vetëvendosje, parti e cila doli e para në zgjedhjet e 9 shkurtit, ngjashëm si paraardhësi i tij Albin Kurti, nuk arriti të zgjidhej kryeministër, duke i hapur rrugë mbajtjes së zgjedhjeve të reja. Para takimit, liderët e PDK-së dhe AAK-së deklaruan se si datë për zhvillimin e këtij procesi preferonin 21 dhjetorin ose 11 janarin.

Gazetare: Vjollca Zhari

/rtsh.al/