Lumi Seman ka kaluar pikën kritike të rrezikut, duke shkaktuar përmbytje të gjera në tokat bujqësore dhe zonën naftëmbajtëse në Belinë. Niveli i ujit në urën e Mbrostarit ka arritur në 4.5 metra, nga 3 metra që konsiderohet kufiri kritik.

Rritja e prurjeve vjen si pasojë e reshjeve të dendura përgjatë gjithë javës, si dhe shkarkimeve nga hidrocentrali i Banjës. Përmbytjet kanë prekur dhjetëra puse nafte në zonën e Belinës, ndërsa uji ka mbuluar gjithashtu sipërfaqe të mëdha tokash në Suk dhe Jagodinë të Roskovecit, si edhe në Belinë dhe Kallm të Fierit zonat e para të goditura nga situata.

Ekipet e Emergjencave Civile janë në terren dhe monitorojnë zhvillimin e situatës, ndërsa Bordi i Kullimit po punon për forcimin e argjinaturës së Semanit me hedhje dheu (argjile) në pikat e dobëta. Përmbytjet kanë përfshirë disa banesa, ekonomi bujqësore, sera dhe panele diellore, duke shkaktuar dëme të konsiderueshme materiale.

/rtsh.al/