Ministria e Shëndetësisë dhe Mirëqenies Sociale ka njoftuar përmbylljen e procesit të Vlerësimit të Jashtëm të Përbashkët (JEE), duke renditur Shqipërinë ndër katër vendet e Europës që kanë zbatuar versionin e ri të këtij mekanizmi, JEE 2021.

Ky vlerësim u realizua me mbështetjen e Organizatës Botërore të Shëndetësisë dhe ekspertëve ndërkombëtarë, duke përfshirë 19 fusha kyçe të sigurisë shëndetësore, si survejanca, laboratorët, biosiguria, reagimi ndaj emergjencave, komunikimi i riskut dhe siguria ushqimore.

Vizitat në terren dhe diskutimet me ekipet multisektoriale sollën një panoramë të plotë mbi kapacitetet e vendit, duke evidentuar pikat e forta, sfidat dhe hapat e nevojshëm për përmirësim.

Sipas MSHMS-së, gjetjet e këtij vlerësimi do të shërbejnë si bazë për hartimin e Planit Kombëtar të Veprimit për Sigurinë Shëndetësore, i cili synon të forcojë përgatitjen e Shqipërisë ndaj çdo emergjence dhe të garantojë një sistem shëndetësor më të qëndrueshëm dhe më të sigurt.

/rtsh.al/