Dhuna me bazë gjinore po rritet në Lezhë. Sipas të dhënave zyrtare, këtë vit po trajtohen 100 raste, një rritje që lidhet edhe me ndërgjegjësimin në rritje për denoncimin e dhunës.

Më të prekura mbeten shtresat në nevojë, ku dhuna shpesh nis në formë digjitale dhe më pas shndërrohet në fizike, ndërkohë që edhe disa burra kanë kërkuar urdhër mbrojtjeje.

“Shumica e rasteve na vijnë nga gratë vulnerabël, familjet me probleme ekonomike, por kemi edhe familje intelektuale që janë me urdhër mbrojtjeje, sidomos disa familje që janë në proces divorci,” tha Marte Fetaj, drejtoreshë e Shërbimit Social, Bashkia Lezhë.

Përmbyllja e Fushatës së 16 Ditëve të Aktivizmit kundër Dhunës me Bazë Gjinore u shënua me një aktivitet sensibilizues, ku u përcollën mesazhe kundër këtij fenomeni.

Gjatë këtyre 16 ditëve, qyteti u përfshi nga veprimtari që synojnë denoncimin e çdo forme dhune, me qëllim identifikimin e hershëm dhe ndërhyrjen në kohë, për të shmangur agravimin e situatës.

/rtsh.al/