Sekretari i Përgjithshëm i NATO‑s, Mark Rutte, ka deklaruar se rritja e ndjeshme e shpenzimeve të mbrojtjes nga vendet anëtare është “suksesi më i madh i politikës së jashtme” të presidentit amerikan Donald Trump. Sipas tij, presioni i vazhdueshëm nga Uashingtoni ka bërë që aleatët të angazhohen për të arritur objektivin e ri prej 5% të PBB‑së për mbrojtjen deri në vitin 2035.

Rutte theksoi se NATO është “më e fortë se kurrë”, ndërsa paralajmëroi se aleanca duhet të përgatitet për një periudhë të pasigurt, duke pasur parasysh rritjen e kapaciteteve ushtarake të Rusisë.

Ai kujtoi vlerësimet e disa vendeve evropiane se Moska mund të paraqesë rrezik për aleatët brenda pesë viteve të ardhshme, edhe pse Rusia i ka cilësuar këto paralajmërime si të pabazuara.

Në deklaratat e tij, Rutte nënvizoi se rritja e investimeve në mbrojtje është thelbësore për të ruajtur balancën e sigurisë në Evropë dhe për të garantuar që NATO të mbetet e gatshme të përgjigjet ndaj çdo kërcënimi.

/rtsh.al/