Skena e Festivalit të 64-të mblodhi bashkë dy energji të fuqishme vokale në natën e Nostalgjisë. Mezzo-sopranoja e njohur, Vikena Kamenica, një emër që lëviz me lehtësi mes skenës operistike dhe muzikës së lehtë, iu bashkua konkurrentes Enxhi Nasufi për të sjellë hitin e pavdekshëm “Flakë e Borë”.

Performanca e tyre u prit me ovacione, ndërsa vetë Kamenica nuk i fshehu emocionet për rikthimin në këtë skenë që mbart histori.

Në një intervistë të shkurtër me Salsanon, Kamenica theksoi se lidhja e saj me Festivalin është e shumëfishtë, duke e parë atë nga çdo kënd i mundshëm: si garuese, si gjykuese dhe si publik. “Ndjehem shumë e emocionuar dhe festivali është një emocion i veçantë. Jam jo vetëm pjesëmarrëse, anëtare jurie, por edhe shikuese,” u shpreh ajo.

Duke u ndalur te titulli i këngës, Vikena bëri një paralelizëm filozofik mes tekstit dhe realitetit të përditshëm të një artisti, por edhe të çdo njeriu. “Jam flakë e borë… E gjithë jeta jonë është e tillë, si në Festival, në punë, ashtu edhe në shtëpi,” përfundoi Kamenica.

/rtsh.al/