Banorë të zonës së Nartës kanë konstatuar raste të gjuetisë së paligjshme në lagunë, një territor i mbrojtur për shpendët dhe gjallesat e rralla që strehohen aty. Në terren janë gjetur gjurmë të freskëta gjuetie, fishekë, saçma dhe kurthe për kapjen e zogjve.

Menjëherë janë njoftuar strukturat e zonave të mbrojtura, të cilat kanë ushtruar kontrolle dhe kanë lajmëruar policinë.

Drejtori i Zonave të Mbrojtura, Qarku Vlorë, Martin Gorici u shpreh “Punonjësit janë në terren dhe kanë prishur disa çarqe që janë ngritur nga gjuetarë sporadikë të zonës. Nëse i kapim në flagrancë, bëjmë procesverbalet dhe i referojmë në organet kompetente. Ndërkohë monitorimin e bëjmë të vazhdueshëm së bashku me Policinë e Shtetit.”

Laguna e Nartës mbetet një destinacion i rëndësishëm për biodiversitetin, ndërsa rasti po ndiqet nga policia, pasi gjuetia në këtë territor përbën vepër penale.

/rtsh.al/