Pas 3 muajsh punime, Ura e Cenit në Lezhë u hap këtë të hënë për kalimin e këmbësoreve dhe automjeteve, duke i dhënë fund trafikut të rënduar që ishte krijuar në qytet. Kjo urë nuk garantonte kalim të sigurt ndaj u rindërtua dhe zgjerua, me financim të Fondit Shqiptar të Zhvillimit.

Përfundimi i punimeve i inspektua nga Kryetari i Bashkisë Lezhë Pjerin Ndreu, sipas të cilit “ky investim është pjesë e një vizioni më të gjerë për riorganizimin e qarkullimit urban dhe përmirësimin e infrastrukturës rrugore, me synimin që Lezha të përballojë më mirë flukset sezonale, veçanërisht gjatë muajve të verës”.

E pozicionuar në një pikë strategjike, Ura e Cenit shërben si një korridor i rëndësishëm lidhës mes superstradës dhe brendësisë së qytetit, duke përfshirë edhe një zonë me aktivitet të lartë ekonomik. Hapja e saj do të shpërndajë flukset e trafikut dhe të ofrojë një alternativë të nevojshme për hyrje- daljet nga Lezha.

/rtsh.al/