Viti 2026 ka nisur me jetë të reja në maternitetet e kryeqytetit. Adea, e lindur në maternitetin “Mbretëresha Geraldinë”, dhe Sibel, e lindur në “Koço Gliozheni”, janë foshnjat e para që përshëndetën botën në minutat e para të janarit.

Sipas njoftimit për shtyp, zv.ministrja e Shëndetësisë dhe Mirëqenies Sociale, Eugena Tomini, vizitoi dy nënat e reja për t’i uruar dhe për t’u dhënë çekun e parë të vitit për “Bonusin e Bebes”.

Ky shpërblim financiar është pjesë e programit universal të qeverisë për mbështetjen e natalitetit.

Si ndahet “Bonusi i Bebes”?

Programi, i cili ka mbështetur mbi 245 mijë familje që nga viti 2019, ofron shuma të ndryshme në varësi të numrit të fëmijëve në familje:

40,000 lekë për fëmijën e parë.

80,000 lekë për fëmijën e dytë.

120,000 lekë për fëmijën e tretë dhe pasardhësit.

Për lindjet e shumëfishta, 80,000 lekë për secilin foshnjë në rastin e binjakëve dhe 120,000 lekë për trinjakët.

Zv.ministrja Tomini theksoi se mbështetja e familjeve mbetet prioritet, duke garantuar se politikat sociale do të vijojnë të forcohen për të siguruar një fillim dinjitoz për çdo fëmijë.

/rtsh.al/