Gjashtë vite pasi SHBA ngriti akuzat e para, Nicolás Maduro u ul më në fund në bankën e të akuzuarve në gjykatën federale të Manhattanit. I kapur dhe i ekstraduar në një operacion që të kujton fundin e Manuel Noriegës në Panama, lideri venezuelian dhe bashkëshortja e tij, Cilia Flores, u deklaruan të pafajshëm.

Por, prangosja e tij nuk është fundi i historisë; është vetëm fillimi i një prej betejave ligjore më komplekse dhe të politizuara në historinë e drejtësisë amerikane. Avokatët e tij po përgatisin një mbrojtje agresive që synon ta hedhë poshtë çështjen para se të nisë gjyqi i themelit.

Mbrojtja 1: “Jam ende President”

Linja e parë e mbrojtjes është politike. Në gjykatë, Maduro i tha gjykatësit se ai është “ende president” i Venezuelës, ndërsa gruaja e tij u prezantua si “Zonja e Parë”. Avokatët pritet të argumentojnë se ai gëzon imunitet diplomatik si Kreu i Shtetit dhe se kapja e tij nga ushtria amerikane ishte një akt i paligjshëm “rrëmbimi”.

Dick Gregorie, prokurori veteran që dënoi diktatorin panamez Manuel Noriega 40 vjet më parë, thotë se kjo strategji ka pak gjasa të ketë sukses.

“Për të pasur imunitet si kreu i shtetit, duhet të jesh i njohur diplomatikisht nga SHBA,” shpjegon ai. Uashingtoni nuk e njeh Maduron si president legjitim prej vitesh, por gjykatat mund të duhet të interpretojnë këtë status deri në Gjykatën e Lartë.

Mbrojtja 2: Taktika “Graymailing”

Rreziku më i madh për prokurorët nuk është statusi i Maduros, por sekretet që ai di. Çështja përfshin akuza për narko-terrorizëm dhe lidhje gjeopolitike të ndjeshme. Mbrojtja pritet të përdorë taktikën e njohur si “graymailing” – kërkesën për të paraqitur në gjyq informacione të klasifikuara të sigurisë kombëtare të SHBA-së.

Procesi i filtrimit të këtyre informacioneve mund të zgjasë me vite. Shpesh, të pandehurit e profilit të lartë shpresojnë se qeveria amerikane do të preferojë ta mbyllë çështjen ose të ofrojë marrëveshje lehtësuese, sesa të lejojë që sekrete shtetërore të dalin në dritë në një sallë gjyqi të hapur.

Sfidat e Prokurorisë, dëshmitarët në rrezik

Për të dënuar Maduron për trafik droge, prokurorët duhet të provojnë se ai ishte në krye të komplotit, jo thjesht një spektator. Kjo kërkon dëshmitarë të brendshëm – njerëz që kanë qenë në dhomë me të kur urdhëroheshin dërgesat e kokainës.

Gina Parlovecchio, ish-prokurore në çështjen kundër “El Chapo”, thekson se siguria e dëshmitarëve është makth logjistik. Historia ka treguar se në raste të tilla (si ai i Noriegës apo bosëve të karteleve), dëshmitarët potencialë zhduken, vdesin në aksidente të dyshimta ose vriten para se të dëshmojnë.

Aktakuza e lidh Maduron me organizata të rrezikshme si FARC, ELN, Karteli Sinaloa dhe banda e pamëshirshme “Tren de Aragua”. Prokurorët kanë skicuar episode specifike, si urdhri i Maduros për të kufizuar dërgesat e kokainës drejt Parisit në vitin 2013, çka sugjeron se ata kanë tashmë bashkëpunëtorë të penduar nga rrethi i tij i ngushtë.

Çfarë pritet?

Ekspertët parashikojnë se Maduro nuk do të kërkojë një marrëveshje të shpejtë, por do të “shtypë çdo buton” për të zvarritur procesin.

Me një avokat si Barry Pollack, i cili ka mbrojtur Julian Assange, Maduro po përgatitet për një luftë të gjatë. Nëse shpallet fajtor, ai rrezikon burgim të përjetshëm, një fat i ngjashëm me atë të El Chapos në burgun “Supermax” në Kolorado.

/rtsh.al/