Lumi Shkumbin, ndonëse është rikthyer në shtratin e tij, vijon të përbëjë një rrezik serioz për zonat përreth, për shkak të gërryerjes së vazhdueshme të tokave bujqësore. Situata paraqitet veçanërisht problematike në fshatin Çermë e Sipërme të Bashkisë Divjakë, ku gërryerja e shtratit të lumit po i afrohet banesave, duke rritur frikën e banorëve për ndonjë situatë të papritur.

Sipas banorëve, nga ura deri në zonën e banuar, lumi Shkumbin ka gërryer tokën që prej vitit 2009, në disa segmente deri në 20 metra. Fenomeni është përshpejtuar ndjeshëm gjatë muajit janar, kur pas daljes nga shtrati, rrjedha e lumit është afruar deri në 100 metra pranë shtëpive.

Fshati Çermë e Sipërme numëron mbi 4 mijë banorë, ndërsa rreth gjysma e banesave janë të ndërtuara pranë lumit, duke e bërë zonën edhe më të ekspozuar ndaj rrezikut të gërryerjes.

Gazetare: Heriselda Durmishi

/rtsh.al/