Një sulm ajror rus ka shkaktuar një tragjedi të rëndë ditën e sotme në rajonin e Dnipropetrovskit në Ukrainë. Një autobus që transportonte punëtorë civilë është goditur nga një dron, duke lënë pas një bilanc të rëndë viktimash.

Autoritetet lokale kanë konfirmuar se numri i të vdekurve ka arritur në 15 persona. Viktimat janë identifikuar si minatorë, të cilët po udhëtonin drejt vendit të punës, në momentin kur mjeti i tyre u shënjestrua.

Lajmi u konfirmua nga kreu i administratës rajonale të Dnipropetrovskit, Oleksandr Ganzha, i cili raportoi për mediat ukrainase rritjen e numrit të viktimave pas përditësimeve nga vendngjarja.

Presidenti ukrainas, Volodymyr Zelensky, reagoi menjëherë përmes një deklarate në platformën Telegram, duke e dënuar sulmin si një akt barbar dhe të qëllimshëm ndaj civilëve.

“Sulmi i sotëm rus ndaj një autobusi në rajonin e Dnipros është një krim, një krim emblematik, i cili tregon edhe një herë se Rusia është përgjegjëse për përshkallëzimin e situatës,” shkroi Zelensky.

Duke bërë thirrje për më shumë mbështetje ndërkombëtare dhe vendosmëri, ai e mbylli mesazhin e tij me fjalët: “E keqja duhet të ndalet.”

Ky sulm shënon një tjetër episod të përgjakshëm në konfliktin që vazhdon, duke rritur shqetësimet për sigurinë e civilëve në zonat industriale pranë vijës së frontit.

/rtsh.al/