Kuvendi i Kosovës ka nisur zyrtarisht pasditen e sotme seancën konstituive të legjislaturës së dhjetë. Nën drejtimin e deputetit më të vjetër, Avni Dehari (Lëvizja Vetëvendosje), të zgjedhurit e popullit kanë hedhur hapin e parë procedural drejt formimit të institucioneve të reja.

Me 118 vota pro, deputetët miratuan formimin e Komisionit të Përkohshëm për Verifikimin e Kuorumit dhe Mandateve. Menjëherë pas votimit, seanca u ndërpre për një pushim 15-minutësh, për t’i dhënë kohë komisionit të kryejë verifikimet e nevojshme të mandateve të deputetëve të rinj.

Hapja e seancës

Në fjalën e tij të hapjes, kryesuesi i seancës, Avni Dehari, njoftoi se procedurat janë bazuar në mbledhjen përgatitore të mbajtur një ditë më parë me krerët e partive politike.

“Të nderuar deputetë, kryetari i Kuvendit nga legjislatura e nëntë, në mbledhjen e përbashkët me kryetarët e subjekteve politike… ka bërë përgatitjet për mbajtjen e seancës themeluese,” u shpreh Dehari.

Çfarë pritet të ndodhë?

Pas verifikimit të mandateve, deputetët do të bëjnë betimin solemn. Më pas, procesi do të vijojë me zgjedhjen e Kryetarit të ri të Kuvendit dhe nënkryetarëve, duke përmbyllur kështu konstituimin e organit legjislativ.

/rtsh.al/