Seanca e sotme plenare e Kuvendit të Shqipërisë është shenjuar sërish nga tensionet e forta politike, duke u mbyllur me një proces votimi të përshpejtuar. Në kushtet e një përplasjeje të ashpër dhe bllokimit të foltores, mazhoranca ka votuar e vetme agjendën legjislative të ditës, pas largimit të deputetëve të opozitës nga salla.

Punimet e seancës plenare morën një kthesë të menjëhershme kur deputetët e opozitës bllokuan vijimin normal të saj. Shkëndija e tensionit u ndez nga kërkesa e opozitës për përjashtimin e kreut të grupit parlamentar të Partisë Socialiste, Taulant Balla.

Në pamundësi për të zhvilluar diskutimet e parashikuara në rendin e ditës për shkak të bllokimit nga opozita, Balla mori fjalën për të propozuar ndërprerjen e menjëhershme të debateve dhe kalimin e drejtpërdrejtë në procesin e votimit. Ky veprim procedural provokoi reagimin e radhës të ligjvënësve opozitarë, të cilët zgjodhën të braktisin seancën duke lënë vetëm përfaqësuesit e shumicës në sallë.

Bilanci i votimeve, çfarë kaloi dhe çfarë u rrëzua

Me opozitën jashtë sallës, mazhoranca kaloi pa pengesa projektligjet dhe marrëveshjet e rëndësishme, duke siguruar një mesatare prej 80-81 votash pro për nismat e qeverisë dhe duke rrëzuar propozimet e tjera.

Projektligjet dhe marrëveshjet e miratuara:

U miratua me 81 vota pro projektligji për shtesat në ligjin për sistemin arsimor parauniversitar në Republikën e Shqipërisë.

Mori dritën jeshile me 80 vota pro ratifikimi i marrëveshjes së huas me bankën gjermane KfW për programin “Infrastruktura bashkiake V – faza II”.

Me 81 vota pro u kalua projektligji për krijimin e Agjencisë së Mbikëqyrjes në Sistemin e Ekzekutimit të Vendimeve Penale.

U miratua me 81 vota pro ndryshimi në ligjin për kontrollin shtetëror të transferimeve ndërkombëtare të mallrave ushtarake dhe teknologjive me përdorim të dyfishtë.

Me 80 vota pro u votua vendimi për caktimin e anëtarëve zëvendësues në përbërjen e komisioneve të përhershme të Kuvendit.

Projektligjet e rrëzuara nga mazhoranca

Krahas miratimeve, shumica socialiste hodhi poshtë me votë dy projektligje me natyrë fiskale dhe financiare. U rrëzua me 79 vota kundër projektligji për ndryshimin në ligjin “Për taksat kombëtare”; si dhe u rrëzua me 78 vota kundër projektligji për ndryshimin në ligjin “Për financat e vetëqeverisjes vendore”.

/rtsh.al/